Espainiako Polizia Nazionalak gutxienez zazpi lagun atxilotu ditu Gasteizen eta Donostian “terrorismoa goraipatzearen” akusaziopean. Honen aurrean, Amnistiaren Aldeko eta Errepresioaren Aurkako Mugimenduak honakoa adierazi nahi du:
Ohikoa bihurtzen ari da “terrorismoa goraipatzea” leporatuta ezker abertzaleko militanteak atxilotzea eta ekitaldi publikoak debekatzea. Hori da, behintzat, Estatu espainolaren txakurrek (uniformedunek zein gorbatadunek) erabiltzen duten aitzakia. Presoen eskubideak aldarrikatzea edota errepresaliatuen izaera politikoa defendatzea “biktimen memoriari” eraso egitea omen da.
Errealitateak, ordea, erakusten digu faxistei ez zaizkiela batere axola beraiek biktimak deritzatenak. Axola zaien bakarra herria mututzea da bertsio ofiziala ez den beste iritzirik entzun ez dadin. Atxilotuek biktimak umiliatzen dituztela diote Espainiako Estatuko ordezkariek, baina benetan umilazioa bilatzen dutenak beraiek dira. Euskal Herria oinazpian mantentzea eta historia desitxuratua idaztea bilatzen dute.
Faxistek euren ibilbide lotsagarri eta kriminala zuritu nahi duten garai hauetan inoiz baino garrantzitsuagoa bihurtzen da Herriak memoria historikoari heltzea, gauza bakoitzari bere izenez deitzea: faxistari faxista eta borrokalariari borrokalari. Alderdien legea, “biktimen errespeturako” legeak eta oro har herriari ahoa estaltzea bilatzen duen edozein neurri gainditzeko momentua da. Adierazpen askatasuna eskuratzea garesti jarri nahi digute eta borroka hau emateko ordua da.
Azkenik, atxilotutako pertsona guztiei gure elkartasuna adieraztea eta beraien askatasuna galdegiteaz gain, Espainiako Polizia eta Guardia Zibilaren kanporatzea ere aldarrikatzen dugu. Alde hemendik! Zuek zarete terroristak!
Euskal Herrian, 2015eko irailaren 17an.
Amnistiaren Aldeko eta Errepresioaren Aurkako Mugimendua.