Zerbitzuz kanpo zegoen Ertzain batek kamioilari bat tiroz hil zuen atzo Leitzan trafikoari buruzko eztabaida bat izaten ari zirenean. Erailketa honen aurrean, Amnistiaren Aldeko eta Errepresioaren Aurkako Mugimenduak honakoa adierazi nahi du:
Hasteko gure doluminak helarazi nahi dizkiogu kamioilariaren familiari. Guztiz bidegabea da bizitza aurrera ateratzeko lanean ari den garraiolari bat trafiko istripu baten ondorioz etxera ez itzultzea, baina askoz ere bidegabeagoa trafikoari buruzko eztabaida baten ondorioz polizia batek, administrazioak bere esku utzitako arma erabiliz, tiroka erailtzen duenean.
Gertaera hau Euskal Herrian gertatzea, ordea, ez da kasualitatea. Hego Euskal Herrian 1000 biztanle bakoitzeko dagoen polizia kopurua 6 baino gehiagokoa da, Europakoa 4ra iristen ez den bitartean. Honi militarren, bizkartzainen eta modu ez ofizialean kontrol sozialerako erabiltzen dituzten “Segurtasun Indarretako” poliziak batzen bazaizkio ratioa 1000 pertsonagatik 10 baino gehiagokoa izan daitekeela estimatzen da.
Ezinbestekoa da Euskal Herriak pairatzen duen militarizazioaren inguruko eztabaida jendearen artean zabaltzea. Kontua ez da bakarrik Guardia Zibila, Polizia espainola, Jendarmeria eta Polizia frantsesa, edota armada bezalako indar okupatzaileak Euskal Herritik alde egitea, baizik eta hemen bertan sortutako poliziekin zer egin.
Argi daukagu ez dugula nahi langileak hiltzen dituzten kontrolik gabeko elementuak barnebiltzen dituen poliziarik, ezta kontrolatuta egon arren politikarien interesen arabera herria kolpatzen duenik ere. Ez dugu nahi pilotakadaz jendea hiltzen duen poliziarik, ez dugu nahi adierazpen askatasuna zapaltzen duen poliziarik, ez dugu nahi salbuespen legedia aplikatzen duen poliziarik nahi. Berriro ere azpimarratu nahi dugu gatazka konpontzeko ezinbestekoa dela gatazkari bide eman dioten arrazoiekin bukatzea, eta hori ez da posiblea izango estatuen memoria partziala inposatzen zaigun bitartean, polizia indarren papera errepresiboa aztertzen ez den bitartean.
Bukatzeko, Amnistiaren Aldeko Mugimenduak kamioilariaren erailketa PNVk, PSOEk eta PPk gerra egiteko prestatutako polizia ereduaren ondorioa dela salatu nahi du eta, ondorioz, heriotza honen arduradun politikoek dagozkien erantzukizunak ordain ditzatela exijitzen du. Ertzaintza hau ez da herriarena eta Ertzaintza hau ez dugu onartzen.
Euskal Herrian, 2015eko ekainaren 5ean.