Laguntza eskaera ez da berria, Perez-Rosadok dioenez: «Sahararren egoera ezagutarazteko eta salatzeko asmoarekin egindako lan mordoa dago. Jaialdi honetan bertan, Alvaro Longoriaren Hijos de las nubes, la última colonia film dokumentala aurkeztu dute, adibidez. Baina Wilaya ez da salaketa sozial soila; kanpamenduetan bizi direnen egunerokotasuna, sentipenak, gizartearen aldaketak jasotzen saiatu gara».
Hamasei urtez Valentzian bizi ondoren, Smarako Wilaya jaioterrira bueltatuko da Fatimatu (Nadhira Mohamed), ama biologikoaren hiletara. Han, Jatri anaia (Mohamed Mulud) eta Hayat ahizpa elbarria (Memona Mohamed) topatuko ditu. Fatimatuk Mendebaldeko kultura eta bizimoduak sakon barneratu ditu, eta arrotzak zaizkio jaioterriko ohiturak. Valentzian utzitako bizitara bueltatzeko irrikan dago. Baina amak familiaren jaima (etxea) utzi dio oinordekotzan, eta ahizpa zaintzen gelditu beharko du. Fatimatuk bi kulturen artean harrapatua ikusiko du bere burua; autoa gidatzen duen Wilayako lehen emakumea bihurtuko da, eta pixkanaka, nortasun propioa garatuko du, bi herrialdeen arteko zubi kulturala eraikiz.
Emakumeak dira filmeko protagonistak. Belaunaldiz belaunaldi sahararren nortasuna eta kultura babesteko borroka egin dute, eta belaunaldi berriak borrokan jarraitzeko prest daude. Memona Mohamed aktoreak saria jaso du Abu Dhabiko Zinemaldian, eta Berlinalen ere aurkeztu dute filma. Mohameden lehen aktore lana da, eta bere herriaren onerako asko saiatu dela adierazi du: «Sahararron egoera munduak ezagut dezan leiho bat da filma. Basamortuan ahaztutako beduinoen herrialdea gara, eta 37 urtez laguntzetatik bizitakoa. Ni bezala, gaixo dauden haur eta helduak daude kanpamenduetan; ni Tindufen jaiotakoa naiz, eta zailtasunak izan ditut bidaiatzeko, ez dudalako nortasun agiririk. Nire nortasunaren ikur bakarra melhafa buruko zapia da».
Zapia erabiltzeko askatasuna dute emakume sahararrek, eta herritartasuna berreskuratzeko borrokaren ikur gisa erabiltzen dute. Aziza Brahim musikari eta aktoreak sortu du filmeko musika, eta Euskal Herria aurretik ezagutu du, Oreka TXrekin elkarlanean besteak beste. Euskal Herriak sahararren alde egindako lana eskertu du Brahimek. «Asko sufritu duen herrialdeari laguntzeko balio du film honek. Dena den, pauso bat aurrerago doa filma. Gure izaeraren barrenak erakutsiz, gure kulturan azaleratzen zailak diren sentipenak jasotzen ditu; maitasuna, adibidez».