Euskal Herrian abiatu den aro politiko berrian beren jarduera politikoa askatasunez garatzeko eskubidea bermatzeko eskatu dute gazte independentistek eta independentzia eta sozialismoa lortzeko bidean «aktibo» izateko deia egin diote gazteriari.
DONOSTIA-. Gazte independentistek «indarrez» hartzen dute egun bizi dugun «momentu historikoa», Donostian egindako agerraldian nabarmendu dutenez.
150 gazte inguruk komunikabideen aurrean gogora ekarri dutenez, «gatazka egoeran jaio eta bizi» diren gazte belaunaldia dira, eta «oztopo ugari jarri dizkiguten arren, ez gaituzte geldiarazi».
Egungo aro politikoak eta Euskal Herriak dituen erronkek «inoiz baino gehiago» gazteriaren konpromisoa eskatzen dutela nabarmendu dute, eta ildo horretan «ezinbesteko» jo dute gazteriaren lana eta antolakuntza, «Euskal Herria burujabe izango den eta bestelako eredu sozial eta ekonomiko bat eraikiko duen agertokira eramateko».
Nolanahi ere, «gaur-gaurkoz ukaturik jarraitzen duten eskubideak, norbanako zein kolektiboak, bermatzea» lehentasunezkoa dela esan dute eta gazteek jarduera politikoa askatasunez garatzeko duten eskubidea bermatzeko exijitu dute.
Horrekin batera, gazteria «subjektu politiko aktibo» gisa egituratzeko beharra azpimarratu dute eta dei egin diote gazteriari «askapen prozesuan aktibo» izateko.
