Iazko otsailean, Ibai Beobideren atxiloketarekin hasi eta Gipuzkoara eta Bizkaiara zabaldu zen polizia operazioaren baitan hainbat euskal herritar atxilotu eta ankerki torturatu zituzten Guardia Zibilek. Operazio honen baitan Eider Zurriaran atxilotzeko egindua eman zuen epaileak baina honek ihes egin zuen, eta geroztik Lapurdin bizi izan da iheslari politiko bezala.
Bizitza erabat publikoa izan du eta bertako ikastola batean lanean aritu da. Gaur goizean lanera bidean zela atxilotu dute.
Amnistiaren Aldeko Mugimendutik atxiloketa berri hau salatu nahi dugu eta Euskal Herrian ireki den egoera berrian Frantziako Gobernua erakusten ari den jarrera tamalgarria dela esan nahi dugu. Espainiako Gobernuak ezarritako irizpide errepresiboen menpe lanean jarraitzen dute Frantziako epaile eta poliziek, gaurko atxiloketak erakusten duen bezala. Azken hilabeteetan bizitza erabat publiko egin du Eider Zurriaranek, Iraitz Gesalagak egin duen moduan. Baina bien atxiloketak oso une politiko zehatzetan burutu dira, helburu politiko eta mediatiko argiekin.
Errepresioa gelditzeko bidean presioa eta mobilizazioa areagotzeko deia egiten dugu.